2013: Mei

Hierdie maand was ons groep se aktiwiteite weer terug na normaal en het ons die 3 ure saam spandeer deur sommer net heerlik aan dit te werk waaraan ons wou of moes klaarkry.

Ek het aan handkwiltwerk gedoen op 'n bitter ou projek wat ongelukkig net uitgehaal word as daar tennis op TV is (Roland Garros en Wimbledon) want dis doodeenvoudig net te warm om ander tye onder die reuse kwilt te sit en werk.  So ek vermoed die projek gaan nou 'n hele paar jaar neem om te voltooi.

Anida het besluit om haar 3 ure te gebruik om broeke se some in te sit.  Ek dink as ons dit vooraf geweet het, sou baie meer van ons self ons broeke na haar wou bring.

Bettie wou nie haar gesig wys vir die foto nie omdat sy voel dat die kwilt al te veel gewys is en sy nog nie klaar is nie.  Hou moed, die einde kom darem al hoe nader.

Breggie werk nog eenstryk deur aan haar hoenderkwilt en ek dink die kleurvolle prentjie gaan 'n gesig wees om te sien as dit klaar is.

Charlene het jou werklikwaar nog tyd gekry om aan haar Graffiti blokkies te werk ongeag dat sy halfpad deur ons bymekaarkoms eers moes ry om 'n kind by sy aktiwiteite te gaan haal.  Die vele deugde van 'n ma darem......

Dit lyk of Connie boedel oorgee, maar nee, die vrou van vele talente het haar kwiltwerk vandag verruil vir 'n bietjie breiwerk.

Kokkewiet het wys besluit om 'n baba kombersie om te hekel.  In die koue sou ek die outjie liewers op my skoot laat lê vir 'n bietjie hitte.

En is die hekelwerk van Linda nie absoluut pragtig nie?  Ek kan al die mooiste sak hiervan voorstel, maar ek dink Linda mik dalk groter.

Groepleidster Marie het darem ook gemaak of sy iets doen.  Gewoonlik gil sy net op ons om goed te moet doen.

Petro het nog van haar verborge talente gewys toe sy met die allerpragtigste kunskwilt blokke na vore kom.  Nee gits, daar is hope talent in die groep.

Ria is besig met 'n "freezer paper" appliek BOM en in die mooiste kleure.  Nog iets om na uit te sien as dit klaar is.

Rina druk besig met haar Graffiti blokke vir ons uitruil projek.

Teen die tyd wat ek hierdie foto's op het, is almal weer druk besig met hul normale werksroetine, maar volgende maand hou ons Nasionale kwiltfees in Bloemfontein en die maand daarna maak ons weer so.

2013: April

Van enige kwiltwerk was daar nie op hierdie bymekaarkoms enige sprake nie.  Ons moes pak vir ons Nasionale Kwiltfees wat in Julie vanjaar hier in ons tuisdorp gehou word.  Ons groep werk egter heerlik saam en sommer gou-gou het ons 'n goeie stelsel gevind waar ons ernstig begin oopvou, pak en tel het.  Hier is ons in aksie.

v.l.n.r:  Marie, Rina en Breggie

v.l.n.r:  Kokkewiet, Anida, Marie, Ria (se hare), Linda en Connie

 En dan ons amper voltooide eindresultaat.

Ons het ons beplande halfpadmerk met die verpakking bereik en kan dus volgende maand die ander helfte doen.  Vele hande, ligte werk.

Voordat die groot verpakking egter begin het, het Anida en Petro gou vir ons hul nuutste voltooide skeppings kom wys, net om ons almal te herinner dat ons eintlik nog kwilters en nie pakkers is nie!  Dis pragtig julle.

Anida se "scrappy Bargello" - 'n patroon van Iessie Steenberg

Petro met haar harte kwilt

2013: Februarie

Ons eerste bymekaarkoms van die jaar is sommer met 'n Valentyns tema afgeskop, toe groepleidster, Marie, vir ons eetgoed in pienk en rooi gebring het.

Ons kon elkeen aangaan met ons eie werk en daar het alreeds groot opwinding geheers oor van die graffiti blokke wat klaar was en al uitgeruil is.

2012: Desember

Ons groepie het ons laaste vergadering op 1 Desember gehad terwyl die mees welkome reën buite geval het.  Soos gewoonlik was daar nie 'n gebrek aan kos nie en almal se geskenkies wat ons moes uitruil, was netjies verpak.












Afgesien van Petro wat hard moes werk om haar kleinkind se onderbaadjie vir sy doop die volgende dag moes klaarmaak, het daar by die ander van ons nie veel gebeur nie.  Eet en drink het voorrang geniet.

Alhoewel dit na aanleiding van die foto nie gelyk het of groepleidster Marie baie lus was om ons te sien nie, het sy darem die plan van aksie vir die volgende jaar met ons bespreek.

Vir al haar geduld, beplanning en om ons almal op hoogte te hou van wat wanneer moet gebeur, het sy hierdie blykie van waardering ontvang.

Ek wil ook vir die hele groep dankie sê vir my heerlike bederf geskenk en dit net omdat ek alte lekker nonsens van jul almal hier op die blog kan praat.  Dankie julle!

Dan lyk dit of die hele groep heel opgewonde is oor 'n voorstel vir 'n projek vir volgende jaar wat Karin van die Rafels groep met ons gedeel het.  Heelwat werk daaraan verbonde, maar ek dink dit kan tog heel interessant uitdraai.  Dames, ek kan nie wag om jul eerste graffiti blokke te sien nie.  My eerste een is al klaar!

2012: November

Ek het ongelukkig 2 maande van ons groepie byeenkomste misgeloop, maar het dit darem net so voor die einde van die jaar terug gemaak.  Ons groep was weereens nie voltallig nie, maar die van ons wat wel daar was, was almal druk besig met ons eie projekte.




Kokkewiet spog met haar Elvis paneel al die pad van London af en ons sien daarna uit om haar voltooide muurbehangsel van die legende te sien.  Verder het sy nog 'n reuse taak aangepak om dasse los te trek vir 'n nuwe kwiltprojek.  Sy is nou nie iemand wat sukkel met een projek op 'n slag nie!



Breggie maak nog pligsgetrou haar hoender blokke en ek het vergeet om te vra of sy op datum is.

Bettie is so op die hond se stert met haar "free motion" kwiltblokke en begin al randstroke aanstik.

Ria is besig met 'n heerlike hand appliek kwilt wat sy van die internet afgetrek het.

Petro se kleinseun het al sy opwagting gemaak en dus sal ouma nou haar stert moet roer anders is hy een van die dae te groot vir hierdie kwilt.  Die einde is darem al in sig.

Nog 'n projek vir 'n kleinkind is die kleurvolle kwilt van Linda.

Anida se Bargello gaan 'n absolute treffer wees as sy hiermee klaar is.

Marie se kersboom is jou werklikwaar klaar, maar toe besluit sy in haar alwysheid dat die bak te klein is en nou sit sy nogsteeds en koekarretjies maak om die pot groter te kry.  Party mense hou van baie werk!

Ek het 'n laslappie hond vir kleindogter Lleia begin en darem die outjie klaar gestik onder erge druk van groepleidster Marie..... dit het kompleet soos 'n PFAFF 'sew-away' gevoel behalwe dat ek die enigste in die martelkamp was!




Vir die groeplede wat nie daar was nie, ons kom weer op 1 Desember bymekaar en elkeen bring 'n bordjie eetgoed, jou eie drankie en 'n toegedraaide geskenkie ter waarde van R50,00 (dit hoef nie kwilt verband te wees nie, maar dit bly jou keuse) saam.  Petro was so verspot om te noem dat 'n handgemaakte geskenkie meer waardeer sal word - weereens jou keuse.

Ek wil ook voorstel dat ons almal al ons gelde op datum voor of op die dag vir Marie gee sodat sy die jaar se finansies kan afsluit.

2012: Augustus

Hierdie maand was ons groepie omtrent uitgedun, maar alle afwesiges het verskoning gemaak en is dus vergewe.  In teenstelling met verlede maand was dit 'n besonders warm wintersdag en het 'n paar van ons dit sterk oorweeg om eerder buite te gaan sit as in die aansienlik kouer kerksaal.

Marie stoom onverpoos voort met haar "Yo-Yo" kersboom en dit lyk amper of ons haar kan glo dat dit hierdie jaar klaar gaan wees.

Ek is baie lui om my masjien groepiedae saam te vat en is bitter dankbaar as ek 'n handwerkie het wat ek kan doen.  Die omboorsel van 'n kwilt was dus die ideale projek vir my.

Charlene se seun is ernstig besig om druk op haar te plaas om klaar te maak met sy kwilt en sy het die paar uur gebruik om die omboorsel te sny en te begin aanstik.  Wonder nou net of die ander kant met die hand of die masjien gedoen gaan word?

Breggie is stil-stil besig om op datum te bly met haar BOM "Funky Chickens" van Fatcatpatterns.

Petro het 'n skok aankondiging gemaak in dat haar kleinseun nou 2 weke vroeër per keisersnee die wêreld ingebring word, want die mannetjie is nou hopeloos te groot vir die kleine mamma se maag.  Petro het dus met 'n stink spoed haar babakwilt begin deurstik.

Linda besig met haar groot blokprojek met die allermooiste oranje lap.  Ek dink menig van ons begeer hierdie kwilt maar Linda maak dit vir haar eie bed.

En die laaste lid teenwoordig was Ria wat besig is met 'n pragtige poppie patroon wat sy by Quiltalk gekoop het en ek dink ons sien almal uit daarna om te sien hoe die kwilt gaan lyk as dit voltooid is.

Die volgende keer wat ons bymekaarkom, is dit amptelik Lente - kom ons hoop die weer speel saam.