2011 Desember byeenkoms

Daar hou ons toe ons heel laaste byeenkoms van die jaar.  Gits julle, dit voel soos 'n paar maande gelede dat ons begin het met ons 2010 boompie kwilte en hier het die jaar daarna al verbygevlieg

Eers wil ons almal vir liewe Rina bitter baie geluk sê omdat sy haar Kleurvolle Kubus kwilt se BOKANT uiteindelik klaar het.  Geweet jy sal swig onder die druk, maar komende Woensdag vier ons dit ordentlik!  Nou moet die outjie nog net deurgestik word nê?

Nadat Rina so bitterlik met haar voltooide bostuk gespog het, was dit tyd vir ons groep om aan die werk te spring.

Petro, wat terug is van haar oorsese omswerwinge moes net gou eers haar naels vyl, maar het toe aan die werk gespring met hierdie pragtige kaleidoskoop kussingsloop wat met die hand verder opgetooi word.

Ons juffrou vir die dag was Ria van der Merwe, wat ons omtrent behoorlik ingelig het oor die gebruik van SOLVE/Avalon vir die maak van materiaal bakkies asook verskeie ander items.




Connie, wat al lekker skeef kan sit na haar rugoperasie, het eers gedink sy gaan aangaan om haar beginnerskwilt met die hand deur te werk, maar ons het haar gou genoeg ingetrek om ook 'n materiaalbakkie saam met ons te maak.

Anida het ook aanvanklik gedink sy gaan kom rondsit en niksdoen totdat sy ook SOLVE in die hand gestop is om haar materiaal bakkie te maak.  Jammer ons het jou af middag so omvergegooi Anida

Hier bespreek ek en Sonja die plesiere van vryhandstikwerk met die masjien.

Sonja het toe ook nie op haar laat wag nie en weggetrek en sommer my bakkie vir my deurgestik.  Ongelukkig was die tafels wat die kerk tot ons beskikking gestel het so vrek hoog dat die arme vrou moes staan om by te kom om te kan kwilt.  Miskien het sy gestaan en kwilt om vir ons te wys hoe professioneel sy eintlik is?

Ek was maar te dankbaar dat sy my masjien beset het, want toe kon ek begin om te proe aan die heerlike Cabernet Sauvignon wat Rina vir ons gebring het.

'n Mens kan sien waar die arme Rina haar dae deurbring, want selfs hier in die kerksaal, gaan werk sy pligsgetrou in die kombuis!  Kombuis of te nie, haar bakkie was klaar en reggesit om te droog.

Kokkewiet fluks aan die vryhandstik om haar bakkie aanmekaar te hou.

Die 'tweeling' (Breggie en Charlene) altyd met groot glimlagte op hul gesigte, besig met hul bakkies.





Hier is Breggie se deurgestikte bakkie - sy het sommer 'n nuwe vryhandstik patroon daarop geoefen- reg om gedroog te word.

Soos gewoonlik geen tekort aan kos nie en as my liewe kort geheue my nie alweer gefaal het en ek onthou het dat ons die aand nog 'n ete gehad het nie, sou ek nie so veel geeët het nie, maar nou ja, gedane sake het geen keer nie.

Rina, wat omtrent familie drama die week gehad het - skoonma het geval en haar elmboog vergruis en susterskind het haar motor gerol - het besluit om te ontlaai deur vir ons 2 bottels wyn te bring.  Nou vra my, Rina en drank, gee nooit te veel goeie dinge af nie en dit was ook nie lank nie of sy praat my om om saam met haar 'n gesinkroniseerde Kung Fu demonstrasie te gee.  Lyk nie of daar te veel sinkronisasie was nie na die wyn nie.

Nader aan die waarheid is dat ons eintlik probeer dans het, maar gits kan 2 oumense nou so verspot lyk en ek glo vas dat met die wyn in, het ons tien teen een gedink ons is 'cool', jonk en 'sexy'.  Nee kyk, my ma het my gewaarsku teen die verkeerde vriende, maar luister ek????

Hier probeer ek naam red deur kuis te lyk vir 'n foto, maar het toe skoon vergeet van al die glase wyn langs my.  Gits en die verdekselse Petro (wat die foto geneem het) is kastig 'n fotograaf.  Kon die vrou dan nie maar net inge'zoom' het  en die glase afgesny het nie?

Wyn en Kung Fu vertoning of te nie, ek was 'n gehoorsame student in die klas en my bakkie is klaar.  Connie is ook klaar met haar bakkie en as ek nie so dom was en nie geweet het hoe om die foto van my selfoon op my rekenaar te kry nie, sou ek hare ook hierby gesit het.

Ons is ook heerlik bederf in dat Ria vir ons elkeen 'n geskenkie gegee het, groepleidster Marie het ons ook bederf met 'n lappie, sjokolade, naalde en 'n borduurgaretjie en ek het 'n ekstra bederf by Kokkewiet in die vorm van 'n vrugtekoek gekry.  Sy het seker al gehoor dat ek nou nie juis bekendheid sal verwerf vir my bakwerk nie.  Dankie julle, dit word opreg waardeer.

Tot die 14de Januarie 2012 wanneer ons weer bymekaarkom, wens ons al ons vriende 'n wonderlike Kerstyd en Nuwe Jaar toe.  Ry veilig, geniet die gesin en familie, rus ordentlik uit, want volgende jaar werk ons volstoom aan die feesdinge.

2011 November byeenkoms

As skryfster van ons blog, het ek besluit om dit voortaan as vorderingsverslag van ons groep te hou.  Sommige mense, soos die persoon hieronder, kom maand vir maand met presies dieselfde blokkies by die groep aan, maar maak nooit klaar nie.  Dus het Rina hierdie maand haar finale waarskuwing gekry om haar Kubus kwilt klaar te maak voor ons Desember byeenkoms.  Ons weet jy kan, Rina!!

Bettie het kom spog met haar amper voltooide "free motion" kwilt en ai, ek was sommer lus om nog een te maak, nadat ek hare gesien het.  Dit bly maak 'n lekker speletjie.

Hier is 2 van haar blokke van naderby gesien.












Onthou die vrou is 'n praktiserende dokter, het intussen nog 'n dogter se troue gereël en vir ons vandag die foto's kom wys.  Die mense het gewerk dat dit klap aan al die voorbereidings.  Asof dit nie genoeg is nie, maak sy toe sommer nog so vinnig tydens die groep vir ons hierdie voorbeeld van gevoude afdroogdoeke wat 'n ideale geskenk vir 'n kombuistee is.

Dit lyk kompleet soos 'n uitrusting.  Nou toe liewe Rina, laat vriendin, Bettie, vir jou 'n aansporing wees en kry tog daai Kubus kwilt klaar!

Connie het, stywe rug en al, weer vandag by ons ingeskakel en sy is kliphard besig om haar Beginnerskwilt met die hand te kwilt.  Dit lyk pragtig.

Twee sussies, Breggie en Kokkewiet, het hul voltooide Beginnerskwilte vir ons kom wys en dit lyk my die hele familie is so kunstig en talentvol.

Breggie het intussen aanbeweeg en maak 'n Karre kwilt vir haar man.  Baie appliekwerk, maar ons weet sy kan dit doen.  Kokkewiet gaan nou in alle erns haar Kubus kwilt begin.

Anida, kan na haar oogoperasie, weer presies sien wat sy aanvang en het ook nie op haar laat wag om 'n lekker "scrappy triangle" kwilt vir haar seun te begin nie.  Lyk my sy het sommer so vinnig-vinnig vir haar 'n kortpad uitgewerk en dit behoort haar nie te lank te neem om te voltooi nie.

Sonja, wat 'n bietjie laat was, het haar so stomgeskrik toe ek met kamera en al op haar afstorm dat sy nog moes krap om te wys waaraan sy wou werk.  Sy is besig met die kwartaal se Lotto blokke en dan moet haar Beginnerskwilt ook nog aanmekaarkom.  Nog genoeg om jou mee besig te hou, nê Sonja?

Charlene, wat al verlede maand haar voltooide Beginnerskwilt kom wys het, is alweer volstoom aan die werk aan 'n "four patch" kwilt vir haar pa.  Van pa's gepraat, het julle die mooi liedjie vir sy pa gehoor, wat Snotkop sing?

Charlene was ook erg trots op Kevin, haar seunskind in graad 7 met sy 7 onderskeidings.  Soos ek gesê het, ek vermoed hy aard na sy pa???

Petro jakker nog heerlik oorsee rond en dink natuurlik nie eers aan ons nie.  Laaste wat haar familie van haar gehoor het, was sy in Amsterdam, dis nou nadat madam in Engeland was.  Wee jy, party mens, het ook al die pret!

Liewe Ria het alweer verskoning gemaak.  Gits, die vrou het hopeloos te veel ysters op die vuur en sukkel om by haar eie sosiale skedule in te pas.

Groepleidster, Marie, werk, soos Rina, nou al vir maande aan dieselfde ding, maar waar Rina darem met 'n kwilt sukkel, ploeter Marie op EEN blok aan en kom nie klaar nie en dan lyk sy nog verdomp trots daarop! 

Toe sy boonop vandag lostrek en praat, het sy ook omtrent nie klaargekom nie, maar ons het GROOT dinge rondom ons pligte by ons Nasionale Kwiltfees in 2013 bespreek.  Baie werk, min geld, maar ons vat die outjies stukkie vir stukkie en kry dit gedoen, want ons KAN.

Marie kon ook spog met haar oudste seun, Christo, wat 2 goue medaljes vir skyfskiet gewen het.  Stil kind die................ aard beslis ook na sy pa!!

Ek kon beswaarlik begin met my handwerk BOM, want so moes ek net notas neem dat dit klap omdat die koppie nou mos nie meer alles wil onthou nie.

Ons gesels weer volgende maand!

2011 Oktober byeenkoms

Ek was ongelukkig siek met hierdie vergadering, maar groepleidster Marie, het pligsgetrou haar kamera saamgevat sodat ons darem kan sien wat als gebeur het tydens die byeenkoms.




Charlene het met haar voltooide beginnerskwilt kom spog en ai, sy het werklik genoeg rede om daaroor te spog.  Dis so mooi.  Dankie Charlene.





Breggie lyk al te dankbaar vir die foto onderbreking terwyl sy aan haar beginnerskwilt werk.

Dit lyk kompleet of dokter Bettie hier vir Rina vertel "noudat die troue agter die rug is, het ek niks oor nie..... nie geld nie, nie energie nie en kyk ook nie lap om aan te werk nie!"  Baie geluk Bettie, ons kan nie wag om die foto's van jou dogter se troue te sien nie.

Saam met my was daar nog 'n hele spul van ons groep afwesig vir verskillende redes:
Kokkewiet:- was jou werklikwaar alweer siek.  Die longontsteking wil haar nou maar eenmaal nie 'n breek gee nie.
Connie:- het 'n rugoperasie gehad en het seker nie kans gesien om vir 3 ure lank te staan en wieg of op die vloer te lê nie.
Anida:-  het 'n oogoperasie gehad.  Nou gaan sy wraggies mooi sien hoe om haar kwilte perfek te maak.
Sonja:- moes haar ma gaan haal en dit maak nou nie saak hoe groot ons raak nie, as ma praat, luister ons!
Petro:- het haar pakkasie vir haar oorsese reis reggekry.  Hoe gelukkig kan 'n mens wees?
Ria:- ek weer ongelukkig nie hoekom sy nie by ons groepie kon wees nie, maar ek is seker daar was 'n goeie verskoning, want wie wil nou sulke goeie geselskap vermy?

Tot November se vergadering, lekker kwilt!

2011 September byeenkoms

Ai en in die gewoel vergeet ek toe skoon om van ons September byeenkoms te vertel en nou kan die koppie mos ook nie meer als onthou wat gebeur het nie.

Ons beplan nie vir elke groepsbyeenkoms 'n tegniek of nuwe kwilt nie, maar gebruik die tyd om aan al ons UFO's te werk.  Hierdie kker het ek my kamera by die huis laat lê en groepleidster, Marie, het dus met haar kamera gespeel.

Ek is doodeenvoudig te lui om my sware masjien te laai en saam te vat, dus verkies ek om 'n handwerkie te doen en nee, ek sit nie met my voete op 'n ander stoel omdat ek gemaklik, lui of ryk is nie.  Ek het gevind dat dit die stremming van my rug afvat, veral met handwerk waar 'n mens geneig is om vooroor te leun.

My kwiltmaatjie, Karin, het spesiaal haar kerkklere aangetrek om vir ons te kom kuier.

Breggie met haar 'crazy patch' blok in rooi en pers vir PFAFF se kwartaallikse "Block Lotto"

Petro by die ligtafel en sy lyk maar net so kwaai, eintlik 'n liewe dier.

Sonja hard aan die stik.  Sy is beslis nie te lui om haar masjien saam te ry nie.

Kokkewiet bitter na aan klaar met haar beginnerskwilt en ek het die foto's van die voltooide kwilt gesien, dis asemrowend mooi!

Ria, altyd met 'n glimlag op haar gesig, besig met Iessie se Bargello kwilt in die allermooiste kleure.

Rina meet en pas om haar Kleurvolle Kubus kwilt aanmekaar te kry.

Ons sit koppe bymekaar om Rina te help met die Kleurvolle Kubus en dankie tog vir Breggie se skerp geheue, want as arme Rina na my moes luister was dit een generale flop.

En hier is die hele groep, behalwe natuurlik die afwesiges en Marie wat agter die kamer gestaan het, aan't werk.